Chin Ram Ah Ziang Ruangah CDF A Suak

 

2021 ih Ralkap in thuneihnak an lon hnu in Myanmar ram sung hmun tin ah duh phornak a phunphun a suak. Ralkap lam in hriamhrei hmang in zamzawhtu pawl an suam ruangah mipi lam tla in hriam kai an thok phah.

Asinan Chin mino pawl hrangah hriam kai hi rem an rak ti lo, ziangah tile CNF/CNA a rak um zo ruangah a si. Kan theih cia vekin 2021 hnu Chinram ih hriamkainak cu thlanglam Chinram in a thok. Mindat le Kanpalet lam mino pawl in ralhrang pawl do a ttul tiih an hmu tikah mahte do a rem lo an tiih CNF/CAN an rak pehtlaih. 2021 March 30 ah Mindat le Kanpalet mino pawl in CNF tang ihsin ralhrang do dingin an rak biak. Asinan CNF lam in rem an ti lo, a san cu CNF cu NCA ih telmi an si ruangah ti a si.

Neta lamah tla Mindat lam mino pawl CNF tang ih traning ding le CNF ih bawm ding in bomnak an dil, nan CNF lam in rem an ti lo, cumi cipciar thu pawl cu anmah CNF lam le Mindat Mino (a tui h CDF Mindat) pawl in an thei bik ko ding.

2021 Ralkap thuneihnak an lon hi, zo cio in rei a diah ding an zum lo. Kawl Politician pawl a simi, Min Ko Niang te pawl nih tla “tu hnu zarh khat kan tan thei cun, ralhrang pawl cu an cem,” tiah an ti. Cutiin zo cio ih rak ruat deuh cu a si hmang. CNF pawl tla a thok ah hi tiih an ruat tla cu mawh phurh ding a um fa-hran lo in ka hmu. Curuangah CDF lam tha an pek ngam lonak tla cu a si ding. Cun CDF tha pek ciamco sehla sumpai lam in le harsatnak an nei ding fawn. Culai ahcun tu vekin mipi hnen ihsin sum khawn a rak um lo tikah.

Ziangkhal sisehla Mindat le Kanpalet mino pawl ih March 30, 2021 ih an rak biaknak rak cohlang sehla cu Chinram ah tu vekin mah le pengtlang ciar in CDF a rak suak lo men ding.

Tusun dinhmun ahcun CDF Mindat cu Chinram hriamkai pawl lakih a cakbik pakhat tla an si. A thok ihsin thinlung lam ihsin cak zetin lai meithal thawn SAC ralhrang rak dotu an si. Asinan tu ahcun SAC dotu bu Dangdang thawn tla p[eh tlaih awnak nei in a tu ahcun, Chinram hriamkai pawl lakih a cakbik pakhat ah an cang.