2006 kum ah Lunglui Kual Baptist Area (LKB) hmin in Falam Peng Saimun khua ah Camping kan tuah.LKB Sungah cun Saimun, Khawdar,Cicai,Bualhmin le Khawpual kan si.
Cumi kan tuah rero lai ah zankhat cu zo ih hoha,ti theih lo mi CNF/CNA ralkaap pawl cu Bocung khua ihsin Saimun khua ah zan nazi 7:30pm hrawngah Saimun khawbawipai inn ah an thleng.
An thlen tikah kan Khawbawipa Pa Sai Lian Thang cu an beeng ciamco.Na hna ṭuanpi pawl va ko thluh aw. Na kothei lo a sile kan lo kapṭhat ding an ti.Cuticun Pa Sai Lian Thang cun ṭih emem in a ko thluh. Cutikah tu rori in nan khuataang in paisa ks,(300,000/-)nan pek a ṭul.Nazi 9:00PM tiang ka hngak ding.Nan pek thei lo a sile nan fapa kan kai ding an ti.Cumi lai ah pasai ting(3) hi man a neizet lai.
Cuticun khawsung pituhsit pawl cu zanthim lakah paisa khon in khaw sungah an vaak ciamco. Nazi 10:00Pm a kim tikah paisa ting(3) an dil mi cu ngah lo in ting (250000/-)lawng an khon ngah.
Cutikah caan kan nei nawn lo tin Saimun khawbawi Pai fapa Salai Sai Cung Nung cu an kai. Vanthaṭ ruangah kan ti ding maw ? Tibual lam ihsin Ralkap pawl cu Bocung zin zawhin an ra hngelcel ve. Cuticun Saimun khuakiang Baibeeng Tiva (Baibeeng/bing Lui) kuam sung ihsin zan nazi 1:00AM hrawngah an tongaw dutdi.
Cumi Tiva kuam sung ahcun zan var an kapaw. Ralkap lam ihsin Bomb tla an puah. Meithal khal zuun (200) laihin an kap. Ralkap lam ihsin senhnih pakhat cu an khut zunglai pahnih an kap tan.Cun CNF/CNA lam ihsin cun pakhat a khawng ah an kap ngah ve tin thuthang cu kan theisal.Asinan a dik le dik lo timi cu felfai zetin theih a silo.
Cutin cun CNF/CNA ralkap pawl cu Baibeng Tiva thlun in Saimun khua leiram Buanzaang Mual hnahcang kung hnuaiah an cawl.Cumi ihsin Ciakrawn-Khawpual-Cicai-Congthu khua lam ah an feh ta a si.
Cun Saimun khawbawi fapa Salai Sai Cung Nung khal cu an kapawk tikah tiva kuam sung ahcun a dawp ve.Vanṭhatnak ruangah tivar kuam sung ihsin a zanzan in tivar luang thlun in a suk vivo ih a luat.Ralkap lam ihsin meithal thawn kap ngah awknak pakhat hman a um lo.
Cutincun a thaizing khawvaang tikah Ralkap hrekkhat pawl cu Saimun an ra.Cun an kapngah mi pa cu siivai thawn an thuamlawm. Cutin cun a thaizing ah Rih/Ṭio lam ihsin Ralkap (100) lai Meithal thawn Bomd thawn an ra ciamco.Cutin cun Saimun ah karkhat lai an riak.Rawl an ei.Thu an sut. Ar an kap. Pawta an suai.An ra leuhleuh.
Ralkap pawl ih umsung cu Saimun Ar zuatmi pawl hmuahhmuah a cemthluh zik. Khat lamah CNF/CNA pawl le kan ṭih.Ralkap pawl le kan ṭih.Khawmi cu ṭihphannak thawn kan khat.
Asinan Ralkap pawl hnen ahcun CNF/CNA pawlih paisa an khuan mi cu kan pek lo a si ! tin kan ti. Asan kan pek tita bang sehhla khawtlang zaten an ṭhattheh men ding zum a um. Ziangruangah tile cumi san lai ahcun olsam zetin minung kapṭhat hluahhlo theih a si.
Khatlam ah Pathian thatnak cu Saimun khua ah LKB Area Camping um lo ta sehhla Saimun khua ihsin an kap aw dingih khawmi tampi thihnak le hliamhma kan tuarphah ding a si.
Cumi Camping tumih a zirhtu pawl cu Dr.Tha Nei Fai, Rev.Dr Bawi Ceu, Evan Zil Maam , Evan Pu Zual ect pawl tla an si.
Hithu pawl hi tuisun ni ah remdaihnak rel rero hman sehhla a tuartu mipi hrang ahcun thin a damthei ngaingai hrih lo.
Curuangah a cemcia mi kan tihsual mi thilpawl hi, khat le khat ngaidamnak dilsal awkin hmalaak sal theinak caan umsal sehhla duh a umzet.
(1)CNF/CNA ih paisa an khuandah mi le an hmandan pawl mipi theihter sal a tha.
(2)CNF/CNA ruangah nunnak a liamtu mipi pawl hnen ah ngaidam dilnak tuahsal a tha.
(3)CNF/CNA ralkap in Kawl ralkap vekin Khawte lamih Ar/Vok an ṭhahsak mi le an thawi(hremnak) an pek dahmi pawl hnenah ngaidam dilnak tuahsal a ṭha.
#Note:A famkim deuh le fiang deuhin ngansal leh ding.CNF/CNA huatnak ruangah ngan mi a silo.A taktak thilcang mi sawn a si.
By - Salai Thang
